ایک وین (زبانی اجمل ہارون )

اک وین !

میں کملی تے بختاں ماری
شرم ، حیا وی تیتھوں واری

کج ، کج رکھدی اپنا آپے
میرا ای اندر مینوں چاکے

چن وی اج تے گھورن لگا
سفنے ، میرے پورن لگا

پلے اڈ ، اڈ دیواں دوہائی
لوکاں نے انج ات مچائی

گرجاں وانگوں نوچن لگے
ہتھو ، ہتھ دبوچن لگے

کوئی نئیں کردا گریہ زاری
لٹ لیندے نے وارو واری

ہتھ نہ کوئی سر تے رکھے
میرے تن نوں کوئی نہ ڈھکے

قبریں جا پئے میرے ماپے
کون کرے اج پٹ سیاپے

اپنی جھولی پاوے کوئی
ترس میرے تے کھاوے کوئی

جس نے جمی اوہدی دھی آں
کسے دی میں ہن لگدی کی آں

ایس توں وڈا سوگ نہ کوئی
میرے توں ودھ روگ نہ کوئی

ربوں جے نہ قسمت ہر دی
بابل دی اج دھی نہ مردی

دھی رانی تاں سب توں پیاری
جند جان میں اوس توں واری

اجمل دھاواں مار کے رووے
ربّا ! دھی تے ظلم نہ ہووے

Leave a Reply

Your email address will not be published. Required fields are marked *